ग्रामपंचायत वरवली येथे मुख्यमंत्री समृद्ध पंचायतराज अभियानातील कामांची वरिष्ठ अधिकाऱ्यांकडून पाहणी

शुक्रवार, दिनांक 30 जानेवारी 2026 रोजी ग्रामपंचायत वरवली येथे मुख्यमंत्री समृद्ध पंचायतराज अभियान अंतर्गत राबविण्यात आलेल्या विविध विकासकामांची पाहणी व तपासणी करण्यात आली. यासाठी जिल्हा परिषद रत्नागिरीच्या मा. मुख्य कार्यकारी अधिकारी श्रीमती वैदेही रानडे यांनी विशेष भेट दिली. यावेळी त्यांच्यासोबत उपमुख्य कार्यकारी अधिकारी श्री सागर पाटील पंचायत समिती खेडचे गटविकास अधिकारी श्री गणेश मंडलिक सहाय्यक गटविकास अधिकारी श्री विजय करपे पंचायत समिती खेडचे विस्तार अधिकारी श्री विकास देसाई तसेच कृषी विस्तार अधिकारी श्री गावडे व श्री लोहार तसेच अंगणवाडी सेविका,मदतनीस, आशा सेविका, आरोग्य कर्मचारी उपस्थित होते. या अधिकाऱ्यांनी ग्रामपंचायत वरवली अंतर्गत मुख्यमंत्री समृद्ध पंचायतराज अभियानाच्या कालावधीत करण्यात आलेल्या विविध विकासकामांची प्रत्यक्ष पाहणी केली. तसेच संबंधित दप्तर, नोंदी व प्रशासकीय कागदपत्रांची सखोल तपासणी करण्यात आली. या पाहणीप्रसंगी ग्रामपंचायत वरवलीच्या सरपंच माननीय श्रीमती प्राजक्ता यादव, उपसरपंच माननीय श्री रामचंद्र आखाडे, ग्रामपंचायत सदस्य श्री संतोष यादव, श्री बाळकृष्ण पवार, श्रीमती कमलताई पड्याळ, श्रीमती स्वप्नाली यादव, श्रीमती वैशाली जाधव उपस्थित होते. तसेच सोमजाई ग्राम संघाचे अध्यक्ष, उपाध्यक्ष, सी.आर.पी., ग्रामपंचायत वरवलीचे ग्रामपंचायत अधिकारी श्री विजय निकम आणि बहुसंख्येने ग्रामस्थ यावेळी उपस्थित होते. वरिष्ठ अधिकाऱ्यांनी ग्रामपंचायत वरवलीने अभियानाअंतर्गत राबविलेल्या विकासकामांचे, नियोजनाचे व अंमलबजावणीचे भरभरून कौतुक केले. ग्रामपंचायतीने पारदर्शक प्रशासन, लोकसहभाग आणि नियोजनबद्ध विकास साधल्याबद्दल समाधान व्यक्त करण्यात आले. तसेच पुढील काळात अधिक दर्जेदार व लोकाभिमुख कामे करण्यासाठी ग्रामपंचायत प्रशासनास शुभेच्छा देण्यात आल्या. या पाहणीमुळे ग्रामपंचायत वरवलीच्या विकासकामांना अधिक गती मिळणार असून गावाच्या सर्वांगीण विकासासाठी ही भेट प्रेरणादायी ठरल्याचे ग्रामस्थांनी सांगितले.

30 January 2026